Archiv
KIRBEPREDIGT 2004
Wieder einmal, liebe Leut’
ischd es endlich an der Zeit
dass Ihr uffhöret zu träuma
ond anfanget uffzuräuma
oba drin en de Gedanka
weg mit de interne Schranka
denn erschd dann wird Euch au klar
wie’s dies Johr’ denn wirklich war !
Drom dean onser Predigt nütza
die kann Euch dabei onderstütza
zu unterscheida "Gut" ond "Schlecht"
was war unfair, was war recht
wo kann mr bloß drüber lacha
ond denka: Die send ned recht bacha !
Lasset Euch jetzt inspiriera
also los, koi Zeit verliera
mittendrin, ond ned daneba
los geht’s mit’m Sportler-Leba :
S’Fazit der Olympiade
hoißt für Deutschland wieder: Schade !
Beim Einmarsch eins der größten Teams,
was übrig blieb: "are only dreams" !
Nach langem Suchen kannsch se fenda
em Medaillenspiegel henda.
Ob Ulrich, Franzi, Fußball-Fraua
die andere hend se recht verhaua.
D’Gold-Hoffnunga, die hend versagt !
"Woran liegt’s ?" wird jetzt oft g’fragt.
Hat mr’s z’optimistisch g’seh ?
Oder z’blöd zom Dopen g’wä ?
Apropos z’blöd, do bei de Griecha
konnt’sch s’Anabolika jo förmlich riecha.
Zwischadurch war’s jo fast scho heiter
bei Ungarn, Russa ond so weiter
ließen sich aus Dommheit fassa
bei’m B’scheißa ond falsch Wasser lassa.
Ja glaubet die, es schaffet nur
Nullfichtel bei dr Doping-Agentur ?
Wenn des so weiter geht, gut’ Nacht
bis China dann 2008
Vielleicht hoißt’s dann jo wieder: Schade !
für Deutschland bei der "Epoiade".
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
Für d’nächste Zeila brauch i Kraft
es geht om d’Kick-Europameisterschaft !
Alle Fans waret begeistert
sie hend d’WM jo glanzvoll g’meistert.
Also war d’Erwartung groß
doch scho d’Vorrund’ ging en d’Hos’.
S’erste Spiel war nach mei’m G’schmack
1:0 g’führt, d’Käsköpf em Sack
doch oimol g’schlofa, großes G’schroi
1:1 durch van Nistelroy !
Aus’ma unmöglicha Wenkel
lupft er’n über’n Wörns sein Schenkel.
Trotzdem, des Spiel gab richtig Schwung
doch dann die Ernüchterung:
s’zweite Spiel a rechter Flop
do wünscht mr sich dr Schwung vom Klopp.
Ich sag’s Euch, Leut, do hab ich kotzt:
Litauen a 0:0 abtrotzt !
Em dritta Spiel, oh weh, oh weh,
macht ons d’Eins B der Tschecha heh !
Also hurtig z’sammag’räumt
on em Urlaub weiter träumt
von Deutschland als Turnier-Mannschaft
mit Teamgeist ond mit Willenskraft.
Viel könnet "Otto" jo net riecha
doch der hat’s zeigt, sogar mit Griecha
die sonst halbtags Giros röstet
hat er die deutsch’ Nation getröstet.
Tagelang en Athen Randale
wenigstens oi Deutscher em Finale !
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
So arg d’WM ons hat frustriert
es ischd dann doch no was passiert
wo’s Herz vom Schwoba höher schlägt:
dr Ruuudiii hat sei Amt nog’legt !
Ned mißverstanda, der war echt ned schlecht
doch was danach kam, lieber Specht,
a Nachfolgelösung, zwar a späte,
em Anschluß an die Tante Käthe
mit Präsident, Trainer ond Co.
die alle "soicha geh’n", net "auf’s Klo".
Alle Schwoba, s’ischd die Härta
Leut, es kann nur besser werda !
Gut, Klinsi hat en oigena Schädel
en USA Kinder ond Mädel
doch so schön hat g’jubelt keiner
deshalb: Klinsi for Bundestrainer !
Endlich en Deutschland schwäbischer Stil
ond für d’WM a klares Ziel:
em oigena Land do ischd mr dreister
mir werdet klar Fußball-Weltmeister !
A Anreiz für die ganze Jugend
Kampf ond Wille, deutsche Tugend
En Aufschwung gibt’s, ohne Allüra
scho d’Brasilianer musstet’s spüra
von de Öschis ganz zu schweiga
die musstet huldvoll sich verbeuga
beim Jubiläumsspiel vor Wut
3 mol Kuranyi, zieh’ dr Hut !
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
Dr Blick jetzt ned nach Afrika
noi, nüber nach Amerika :
Jetzt kam wieder, was a Qual
Amerikas Präsidentawahl.
Schafft’s dr Bush, dr alte Schorsch ?
Oder ischd’s Vertraua morsch ?
Hat er oifach nomol Glück
trotz Schulda, Terror ond dem Krieg ?
Oder hilft, nach Michael Moore,
a Wechsel zu John Kerry nur ?
Beide dean se d’Messer wetza
on em Fernseh-Duell hetza :
"Landesverräter" hör’sch dr Schorsch laut baffa
"Wo send denn Saddam’s viele Waffa ?"
kommt sofort vom smarten John
"Ach, wen interessiert des schon ?"
kontert do sofort dr Bush
"A Cowboy duat halt was er muß !"
Es häb jo theoretisch möglich g’wesa sei
Grund g’nuag, do marschiert mr ei
ond a paar Bomba no an Ranza
ihm könnt dr Araber net uff dr Nas’ romtanza.
Gut, es häb’ paar Opfer gäba
die anscheinend nemme läba
au Bagdad sei nemme so schö’
mit Bürgerkrieg ond alles he.
Mr ließ die Leut dort jetzt ned sitza
noi, d’Amis dean ja onderstütza
vor allem d’USA-Wirtschaft
onderstützt mit aller Kraft.
Er versteht ned des Genöhl’
schließlich gäb’s jetzt günstigs Öl
könntet schöpfa aus de Volle
Schorschi hat’s onder Kontrolle.
Beim Kerry woischd ned ganz genau:
ischd der anders oder lügt der au ?
Jedenfalls, es ischd vollbracht
on dr ……………(Namen einsetzen) hat s’Renna g’macht
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
Des amerikanisch Muskelspiel
ischd sogar em Wetter z’viel.
Oi Wirbelsturm bläst d’Backa auf
dr nächste Windstoß folgt glei drauf.
Obacht Amis, s’ischd "High noon"
Zurückhaltung, sonst folgt: Taifun
etwas Demut George, ey man,
sonst "you get a hurrican".
Es verging doch fast koi Woche
en George Dabbelju’s Epoche
ohne dass
wird a Kalifornier nass
von dr Sturmflut, von de Urgewalta
Georgy, dätest Du mol schalta ?
Es ischd die Straf’ vom lieba Gott
macht Euch für Sünda richtig flott
anders kann i des ned deuta
wenigstens ich hör d’Glocka läuta.
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
So, mit Amerika ischd’s z’End
mir wechslet jetzt dr Kontinent.
So langsam find’sch a jede Schlamp
bei RTL em Dschungel-Camp
ob Küblböck, ob Dolly Buster
sie machet’s alle für den Zaster.
Eigentlich g’hört der Scheiß verbota
doch bei dene Einschaltquota
kann mr des Blatt nemme wenda
ond RTL wird weiter senda:
Ekelprüfung, Sammel-G’schick
Maden em G’sicht von dr Frau Nick
Spengemann begrabbschd no d’Naddel
kriegt bald uff s’Hirn nuff mit’m Paddel
Schlanga, Aale, Zickenkrieg
Ausscheidungskämpfe bis i flieg !
Daheim am Fernseh’ sitzt dr Mopp
ond freut sich über jeden Flop
der Prominente do passiert
auf dass er sich au recht blamiert.
Des liefert G’sprächsstoff ohne End’
wenn d’VIPs ens Camp nei g’schissa hend.
D’Bild hat den Stuhlgang inspiziert
ond no wird au glei’ spekuliert:
Ischd der Haufa oba spitz
war’s vielleicht die Lisa Fitz ?
Ischd er aber eher flach
war’s vielleicht au dr Dirk Bach ?
Thema ischd’s auf jedem Flur
Oh Deutschland, was a G’sprächs-Kultur !
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
Ob do einer en d’Hosa pisst
des interessiert doch ned, der Mist,
des ischd doch völlig einerlei
nach Benninga gucket mir nei :
En Benninga, hend festg’stellt mir
wurd g’arbeitet au 2004
bis heut, scho seit em letzta Wendor
am Ruf vom "Internationalen Center".
Dafür gibt’s einige Faktora
ond au Indikatora.
Was froget Ihr ? Woran mr’s merkt ?
An jedem Eck sieht man’s verstärkt !
Es gibt so viele Sacha, die i kenn
die globalen Status henn !
Jetzt dean Euern Kopf ned quäla
mir werdet’s jetzt für Euch uffzähla :
Zunächst amol bemerke ich
gab’s dr erste Spatenstich:
em alta Ortskern, keiner meutert,
wurd dr Friedhof no erweitert.
Des gibt’s en Kiew ned, noch Rom
noch München oder Köln am Dom.
Des nächste hat, so glaubet’s Leut’
weder Hongkong noch Detroit
au ned Tokio, der Moloch:
a Brücke über’s Grottaloch !
Viele hend des ganz falsch g’seh
ond g’moint, es sei Aprilscherz g’wä.
Nein, des war bewusst Kultur
a Meisterstück Architektur.
Vergleiche laufet do scho Sturm
mit "Golden Gate" ond "Eiffelturm".
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
Will Euch des immer noch ned reicha ?
Koi Angst, es gibt no mehr Anzeicha :
Solarzella als Rathaus-Decker
50 Johr Brücke über’n Neckar
d’Blumenstroß’ wird ausgebaut
dass mr se kaum betreta traut.
Leut, die ischd jetzt fast so schö’
wie en Paris d’Champs Elyssée.
Rathausdach saniert ond teert
d’E.I.B. vom Ministerpräsidenta g’ehrt.
Ned mol en Genf ond en Taipeh
gibt’s a Fest am Baggersee.
Senioren-Stub’ 15 Johr ond 75 OGV
Hochwässer en dr Neckar-Au.
A Freizeitkart für’s Bottwartal
FWV g’winnt d’Gemeind’rats-Wahl.
So Highlights, ja die send ned ohne
bringt sogar Gäste aus dr "Zone".
Ich moin die ehemalig’ DDR
ned dass i a Bild verzerr’.
Dr Schultess von Geising war scho da
es folgt wohl au der von Panama,
von Rom, Oslo ond 10 Kirgisen
könnet als Gäst’ mir bald begrüßen.
Wie d’Leut ond Gott des Dorf erschuf
erlangt es jetzt weltweiten Ruf.
Doch es gab au en Skandal
der schadet international
vermindert onsern Großstadt-Flair :
des Grundbuchamt, des gibt’s nicht mehr !
Des ischd a Imageschaden pur
em Netz der Infrastruktur.
Es zog komplett nach Marbach om
des nemmet mir heut’ no kromm !
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
Doch auch em lokalen Sport
setzet sich d’Schlagzeila fort :
a weiteres Jahr Willi Weller !
Holt er dr Fußball aus em Keller ?
Tischtennis, ned die beste uff dr Welt
aber gutes Mittelfeld.
Es gibt zwar koine Jugendtrainer
doch bei de Ringer merkt des keiner.
Hend bei dr Württemberger Meisterschaft
mehrere Titel ond Vizes g’schafft.
Ond z’Beste dann zom Schluß für alle :
d’Gemeinde baut a neue Halle !
Oh, fast vergessa hätt’ des i :
den Blick auf die Gastronomie !
Au do drückt Benninga auf d’Tube
Ergebnis: eine Pasta-Stube.
Benninga ischd en Verhandlung
für d’kulinarische Verwandlung
uff Schwäbisch g’sagt: Metamorphose
ned überall die gleiche Soße !
Konzepte gibt es, es ischd wahr
wohl für a große Sushi-Bar
ond g’schafft wird au mit Akribie
an dr Erlebnis-Gastronomie.
Wohl au, doch des woiß i ned g’wiss
an ma Sibierisch’ Schnell-Imbiß
mit Schneekatz-Schnitzel, Bära-Döner,
am Grill russische Tagelöhner.
Verurteilt zom a riesa Flop
ischd die Idee vom "Coffee Shop".
Wahrscheinlich wär’ a echter Renner
für d’Benninger Getränke-Kenner
a Bahnhofs-Ständle, ohne Klo,
mit Pappbecher "Wodka to go" !
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
Leut’, wenn Ihr mi wirklich fraget
welche Themen ons no plaget
will i Euch ned länger quäla
ond werd’ sie jetzt oifach uffzähla.
Teils send se seltsam ond bemerkenswert
teils koiner sich um diese schert :
Em Januar wurd’s jedem klar
weil’s "Blättle-Schlagzeile" war:
"Die Zahl der Drogentoten ist gesunken !"
Dafür send immer mehr betrunken.
I woiß, dass des koin so drückt
es ischd jo Kavaliersdelikt
für d’Kirbebuaba sowieso
des macht ons au richtig froh.
Beim nächsta Thema sag ich’s unverhohla:
Do hat a Depp a Sitzbank g’stohla !
Ecke Ludwigsburger/Haydn hat en Domma
a ganze G’meindebank mitg’nomma
ond se wahrscheinlich ungeniert
uff sei’m Grundstück dann platziert
oder mit Briketts gegeizt
ond se als Ofenholz verheizt.
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
Des nächste macht ons au beklomma :
Beschwerden hend stark zugenomma !
Abends muasch bloß lang g’nug warta
mit große Ohren en Dei’m Garta
bis Dein Nachbar mol entgleist
ond Dei’ "Lärm-Meßlatta" reißt.
Oi mol em Johr hat er a Feier
ond Du denkst Dir: "Des wird teuer !"
Darauf hast Du jo nur g’wartet
ond sofort Protest gestartet :
"So a riesa Sauerei,
des ganze Johr em nachts a G’schroi.
Wenn des jeder macha dät
von wegen "Einschränkung Lebensqualität".
Ond so häufet sich die Klaga
a Menge, kaum mehr zu ertraga,
personell bei den Gerichten
ond koi Chance, es zu schlichten :
Denn wenn a Nachbar Händel will
steh’n die Hirnzella still !
Verklaga, schlaga, schikaniera,
jo ned mit’nander arrangiera !
Du sparsch ond sparsch, gib’sch koi Geld aus,
kauf’sch oder bau’sch Dei’ oignes Haus
bist glücklich ond Du freusch Dich drüber
ond s’wohnt a Arschloch gegaüber
der sei Gärtle hegt ond pflegt
sich über jeden Scheiß uffregt
ond sofort schreit nach dr Miliz.
Do sehn’ ich mich nach Selbstjustiz
ganz ohne Rechts- ond Würdenträger
oifach mit’m Baseball-Schläger.
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
Ons Benninger goht’s jo ned schlecht
solang’ dr Arbeitgeber blecht.
Doch scheint’s ischd des ned überall
landauf, landab au so der Fall.
Riskieret mir a Blickle nur
deshalb auf onser Konjunktur.
Manchmol geht es blitzeschnelle
so beim Konzern von Karstadt/Quelle.
Von heut’ uff morga ischd’s passiert
ond Du wirschd plötzlich konfrontiert.
Abbaut werda soll ratzfatz
d’Filiale ond Dein Arbeitsplatz.
Dr Markt fordere halt sein Tribut
au dr Vorstand fänd’s ned gut.
Mr müsst nach all den fetten Jahren
jetzt halt au amol was sparen.
Ähnlich g’schwolla ond versiert
wird bei GM argumentiert.
Dr Opel dät’s halt nemme brenga
ond d’Unternehmensleitung zwenga
Arbeitsplätz’ zu reduziera
ond des en Deutschland ausz’probiera.
Dr Arbeitnehmer schreit laut auf
goht glei’ uff d’Barrikada nauf.
Alle send gewaltig g’lada
weil se sollet jetzt ausbada
vom Management die Misswirtschaft
ond zahla mit dr Arbeitskraft
abstürza na bis zu Harz IV
no langet’s kaum mehr für a Bier
nach Feierabend no zom saufa
geschweige denn en Astra z’kaufa.
Des Management des duat beschwichta
mr müsst halt jetzt amol verzichta
auf Urlaub oder au auf Lohn.
Ehrlich g’sagt, des klingt wie Hohn.
Denn während Du Einbußa hast
dr Vorstand sei Gehalt verprasst.
Mir redet dabei von Milliona
des interesssiert den ned die Bohna
kriagt nebaher au no geschenkt
dr Spitzasteuersatz gesenkt !
Vielleicht ben i a bißle blöd
ond i Depp verstand’s bloß ned ?
Mich jedoch der Verdacht ereilt :
do wird ganz ungerecht verteilt !
Oh Leut’, was ischd des für a Land
wo offen, ned onder dr Hand
ich a Vodafon-Fusion
mit 30 Millis no belohn ?
Darauf meinte bloß dr Esser:
es war viel, doch mehr wär’ besser !
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
D’Mission Hoffnung ischd gestartet
alle uff dr Aufschwung wartet.
Aber selbst die Wirtschafts-Weise
prognostizieret : Scheiße !
Nur bei einem fließt dr Speichel
beim Bundesfinanzminister Eichel !
Er häb’ s’Wirtschaftswachstum g’seh
winzig, aber am Horizont sei’s g’wä.
Zweckoptimismus noch und nöcher
trotz riesagroße Haushaltslöcher.
Leut, lasset Euch ned beschwichta
i glaub’, mir müsset’s selber richta
do hilft nur Innovation
ond au ned Merkel ond Union
ned d’Rechte, au ned Westerwelle
send do a Hilfe auf die Schnelle.
Mir müsset ons dagega stemma
s’Leba en onsre Hände nemma
denn der Reim ischd ausgedichtet
wo’s dr Staat scho für ons richtet.
Geht alles schief, gibt’s jetzt a Nummer
gebührenfrei und gega Kummer.
Ruf 0800 - 1110333 ("Nullachthunderthundertelfnulldreimaldrei")
ond alle Sorga send vorbei !
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
Mir hend ewig diskutiert
wer denn den Schluß der Predigt ziert ?
In Einigkeit hend mir dann dacht
dass des dies Johr die Kirche macht :
I hab glei g’wußt, dass was ned stemmt
ond sich dr Mönch doch was verklemmt.
Dr Mönch, der lebe unberührt
ond sei an Sex ned interessiert.
Von Rom bis nuff nach Blankenese
lebe er ständig in Askese.
Moralisch brächt’ ihn nichts ins Wanka
ond er verschwende koin Gedanka
an Orgien ond Geschlechtsverkehr
Jungfräulichkeit fall’ ihm ned schwer.
Jetzt hend die Bischöff’ schö’ blöd guckt
weil’s d’Mönch doch onderm Kittel juckt.
Wüste Feste hend se g’feiert
ond unsittlich rumgeeiert.
Dr Papst en Rom konnt es ned fassa
ond hat dr Kardinal entlassa.
Als se d’PCs en Augenschein hend g’nomma
ischd langsam immer mehr raus komma.
Denn do fanden Detektive
ganze Porno-Bildarchive.
Beate Uhse fänd’s wohl nett
wenn sie so a Sammlung hätt’.
Ehrlich g’sagt, mich wundert’s nicht
denn die Moral von der Geschicht :
Au wenn mr em Kloster wohnt
den Mann dr Urtrieb ned verschont.
Do kommt dann oi Hormon zom andera
ond fangt an, em Mönch rom zu wandera.
Ond draußa blüht dr Seidelbast
ond ihm zerreißt’s dr Beutel fast !
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
A schönes Schlusswort ischd’s für heut’
mit dem i dann au überleit’.
Denn au bei ons soll’s was zerreißa
ond Ihr Euch en d’Hosa scheißa
wenn’s erst langsam em Holz knirscht
ond no dr ganze Sarg zerbirst.
Denn die "Al Quaida-Lomba"
hend ons verkauft die Restles-Bomba.
S’ganz Geld hend dafür mir verprasst
ond kauft, was en dr Sarg nei passt.
Drom lasset Euch von ons verwöhna
ond von dr Druckwell’ d’Haare föna.
Danach mit trock’ne Haar au heuer
ab ond nei zur Abschlussfeier.
So, jetzt mach i aber Schluß
ned weil i will, noi, weil i muß.
Dr Zeitplan ischd halt ziemlich eng
ond langsam muaß en d’Luft des Deng.
I hoff mir hend Euch unterhalta,
doch i brauch jetzt en Tee, en kalta,
aus Hopfa ond a bißle Malz
a g’scheit’s Bier halt, Gott erhalt’s.
Mir Kirbejungs send völlig helle
ond hend "die perfekte Welle"
steuern onser Kirbeschiff
om jede Klippe, jedes Riff.
Mit Witz ond au a bißle G’schroi
bleibet mir dr Kirbe "troy"
denn: Fantastisch send au mir
aber mir send mehr als Vier !
Kontakt
Gemeinde Benningen am Neckar
Studionstraße 10
71726 Benningen am Neckar
07144/906-0
07144/906-27
E-Mail schreiben
